مونگِ فروردین رسی ئو بو گـُلَلْ گـُلزارَه مای
اِ پَلِ دارَل صدایِ بِلبِلِ نازارَه مای
یَ کموتَر وَ دنگِ وِژ هر خدا ماری وَ یاد
اَر کــَشِ کْویْ شاقَه‌شاقِ کـُوگــَلِ گِلدارَه مای
هر نسیمِ تازَه دیریْ اولین مونگِ وِهار
گِل‌گِلی هَم وَشت ئو وارونی اِ سَر ایوارَه مای
گـُل‌گـُلَه زاره هُماریْ تا کـُوئَل پِرّ اَژ صَفا
جاتِنَه، ریحون وَ گــَردِ پوینَه وَ خَلوارَه مای
دِلخوَشی دیری اَژ اْیْ وَختَه بِکِین دیدارِ یار
تامُوینی هر وَ یِ گِل یارِ سَروَن‌لارَه مای
عینَهو شیرین وَ شودیز اَر سِراوِ بیستوین
وَ نَرومِ وِژْ دیارَه هَر گِ وَر پیشیارَه مای
تا مَنیشین اَر کِناریْ اِ دِلِت دْیْ خَم نیَه
شادِمونیْ اَژ وِجودِ دِلبرِ خَمخوارَه مای
اِ «حسین» اَر ذوقِ‌ شعری ئو شعورِت آفرین
اَژ دِلِ پاکِتْ شمیمِ شعرَلِ نومدارَه مای